SHILLONG: Party-oniko ra·gala man·gipa sakbonga Congress MLA-rangni kosako AICC bon·kame chanchie tik ka·gen ine State Congress chief, Vincent H. Pala aganaha.
“Sakbonga Congress MLA-rangna show cause notice on·gipani bidingo MPCC-ni dal·batgipa dilgiparang da·al chanchirimangaha. Indake ong·engon, show cause notice on·gipana aganchakjani gimin chinga ru·utgijan AICC-na u·iatgnok” ine Pala koborni manderangna aganaha.
Uni aganani gitade, ra·galako man·gipa sakbonga MLA-rangni kosako jekoba chanchina gita AICC-o niamtang donga.
Indake ong·engon, “uamangko a·rikgalama a·rikgaljawa, AICC-oniko u·iataniko man·sogijade mamingkon aganna engtoja,” MPCC padot aganaha.
Unomitingo, re·baenggipa 2023 Assembly election-o gimik ge 60 seat-rangon party candidate-rangko susaatna gita party miksongenga ineba ua aganaha.
“Chinga dingtang dingtang constituency-rang baksa agangrikenga. Chingni miksonganide uan, pilak constituency-rangon party candidate-rangko chakatatna tarienga,” Pala aganaha.
MPCC padotni aganani gitade bang·a bang·ja seat-rangonade canidate-rangko de·e minge mesokatgiminrangba dongengaha.
“Chinga iani bidingo namedakede chanchisrangkuja. Iani bidingo mamingko agannaba engtosranga ong·kuja,” Pala aganaha.
Rambrai-Jyrngam MDC, Bajop Pyngrope-ni party-oni ong·katani gimin sing·anina aganchakengon, sakbonga MLA-rangko ra·galani bidingo party-ni obostarangni gimin ua Pyngrope baksa agangrikaha, MPCC padot aganaha.
“BJP-ni bakrimgipa darang sorkarioba bakrimjawa ine chinga iako namedaken kim·kima. Indakoba sakbonga MLA-rang, NPP-ni re·dilgipa MDA sorkarina chakpajachina aganaoba knachaktokja,” Pala aganaha.
