SHILLONG: Bilsi 50-na kingking Assam aro Meghalaya a·dokni simarango ong·enggipa golmalrangko namatna gita Mongolbar salo a·dokni damgnini chief minister-rang, Union Home Minister Amit Shah aro gipin dilgiparangni mikkango soi ka·grikangaha.
Chief Minister sakgnini songgigrikanio soi ka·grikanio a·dok damgnini chief secretary-rang aro Ministry of Home Affairs (MHA)-ni official-rangba dongpae bak ra·angaha.
A·dok damgnini simarango ong·enggipa golmalrangko namatna gita Assam a·dokni Chief Minister Himanta Biswa Sarma baksa soi ka·grikangani ja·man Meghalaya a·dokni Chief Minister Conrad K Sangma, kobor ra·timgiparang baksa agangrikengon, Union Home Minister aro a·dok damgnini dilgiparang, gisiko nange kamko ka·ahani a·selsa a·dok damgnini simarango meligrikna man·jaenggipa biaprangoni damdok jolrangko namatna gita a·dok damgnini gisepo songgigrikaniko dakna man·aha aro ian a·dok damgninasan ong·aigija salgro salaram jol gimiknan gisik ra·beani sal ong·gen ine parakangaha.
“Ian Meghalaya aro Assam a·dokrango songdongenggipa manderangnasan ong·aigija salgro salaram jol gimiknan gisik ra·ani sal ong·gen. Bilsi 50-na meligrikna ong·enggipa golmalrangko namatna gita chinga ia dal·begipa ja·kuko da·alo de·aha,” ine Sangma aganaha.
Chief Minister-ni parakatani gitade, ia bilsini January 29 tariko a·dok damgnini MoU-o soi ka·grikanio pangchakesa ia songgigrikaniko dakaha.
A·dok damgnini simarango meligrikna man·jaenggipa biaprangko a·dok damgnini sorkarirang sandie tik ka·manaha indiba simarangko Survey of India-ni gitasa salgen ineba Sangma parakataha.
“Da·o bangki dongkuenggipa damdok biaprangoba tom·tomaniko ra·bapilna gita chinga kamrangko ka·angkugen aro anga ka·donga chinga meli-nangrimgrikaniko ra·bana cholrangko man·gen,” ine Sangma aganenba, re·anggipa bilsini August ja dipet kamrangko ka·enggipa dingtang dingtang regional committee-rangko aro dingtang dingtang official-rangkoba mittelpilangaha.
