NEW DELHI: Meghalaya a·doko songdongenggipa Hindurangko komibatgipa manderangoni dolsa ine parakchina gita Sukrobar salo, Trinamool Congress (TMC)-ni MP Shanta Chhetri, Union Home Ministry-ko didiangaha.
Parliament-ni Budget Session-o TMC MP-ni parakatani gitade, a·dokni dingtang dingtang biaprango songdongenggipa Hindurang bang·batgiparang ong·jagenchimode Hindurangna minority status-ko on·ani bidingo chanchina man·gen ine ma·mong sorkari, Supreme Court-na u·iatmanahachim.
“Uni gimin badiaba a·doko Hindurang komibatgiparang ong·genchimode Constitution-ni minority-rangna on·gimin bilo pangchake Hindurangba skie on·chakgipa biaprangko kulipana man·gen,” ine TMC-ni MP Shanta Chhetri, Parliament-o aganaha.
