SHILLONG: Shillong songjinmani Mawdiangdiang-o rikenggipa a·dokni gital Assembly nokko sorkari, re·baenggipa September jao nokdonggana manchie donangaha.
Assembly-ni Speaker Metbah Lyngdoh-ni u·iatani gitade, nok rikaniko sorkari, July jao matchotatenba, gipin kamrangko August jani bon·angchibara matchotate, ia gital Assembly nokko September jao nokdonggagnok.
“Assembly nok rikaniko chinga July jao matchotatna miksongenga aro August jani bon·angchibarade ia project-ni gipin bakrangko commission aro test ka·e matchotatgnok,” ine Lyngdoh, Budbar salo sorkari official-rang baksa tom·e chanchirimani ja·man, kobor ra·timgiparangna aganaha.
Nok rikani kamrangko ua chu·ongnikaha ine janapatengon, kamrangko somoi gita matchotatna pilakan rakbee kamrangko ka·enga ine Lyngdoh parakataha.
Kamrangko matchotatna gita tangka paisarangni gimin sing·on, basako ma·mong sorkari ia kamna tangka paisarangko watatgen ua aganna man·kujaenga ine Assembly Speaker parakataha.
“Tangka paisarangni bidingo chinga a·songni Prime Minister Narendra Modi aro Union Finance Minister Nirmala Sitharam baksa agangrikmanaha,” ineba ua aganaha.
