TURA: West aro South West Garo Hills a·jarang, je biaprangon quarry-rang aro crusher-rangko jakkalengachim, uandakgipa a·king Nokmarangna awareness program-ko Sukrobar salo, Tura-ni Walbakgre-o donggipa Green Haven-o ong·atangaha. Ia program-ko Tura Territorial Range-ni Range Forest Officer ong·atangaha.
Ia program-ko ong·atanio Tura Territorial Range-ni Range Forest Officer Quartus Chongkim B Sangma, dingtang dingtang songni Nokmarangna aganprakengon, Miner & Mineral (Regulation & Development) Act 1957-ni bidingo aro Meghalaya Minor Minerals Concession Rules 2016-ko taridaptaiani gimin sorkarini u·iatgipani bidingo agan-talate on·na gita ia program-ko ong·ataha ine parakataha.
Ia niamrangni bidingo a·king Nokmarangna agan-talataniko on·angengon, National Highway aro aro uandakgipa gipin ramarangoni metre 200-ni ning·o, songrang, chibisikrang, dolongrang, damrang, pokkrirang aro state highway-rangoni metre 100-ni ning·o quarry-rangko chalaina aro a·ningni bosturangko bikotna on·jawa ine Sangma parakataha.
An·tangtangni a·kingrango quarry-rangko chalaina on·engon, ia niamrangko ja·rikchina aro a·kingrango quarry ba crusher-rangko chalaina on·na skang, niamo pangchake licence-rangko tarie ra·chengchina gitaba Range Forest Officer, Nokmarangko didiangaha.
Ia program-ko ong·atanio Tura Police Station-ni Circle Inspector Bitching Marak-ba dongpae, Nokmarangna aganprakangengon, a·kingtangtango quarry aro crusher-rangko jakkalanio ja·rikna nanggipa niamrangni bidingo agan-talate on·angskaaha.
A·kingtangtango quarry-rangko gipinrangna chalaina on·gija an·tangtangan chalaichina aro an·tangtangni janggi tangani gadangko tang·doatchina gitaba Marak, a·king Nokmarangko didiangaha.
