TURA: Assam aro Meghalaya a·dokni simarango ong·enggipa golmalrangko namatna ja·ku de·anio Meghalaya a·dokni mitam songrangko Assam-o napatna gita a·dok damgnini sorkarirang, songgigrikaniko dake Memorandum of Understanding (MoU)-o soi ka·grikahani gimin re·anggipa Sombar salo, Garo Hills aro Khasi Hills-ni dingtang dingtang NGO-rang, sorkarini kosako raken jegalanirangko dakangtokenba, dolgni sorkarirangni soi ka·grikgipa MoU-ko den·galpilchina dabiangtokaha.
Sombar salo, Garo Hills-oni GSU-CEC, ADE, AYWO, Tura Garo Senior Citizens Forum (TGSCF) aro gipin dolrang West Khasi Hills a·jaona re·ange Khasi Hills-ni GSU Khasi Hills Zone, KSU Riangdo circle, Nonglang Sirdarship-ni membor-rang aro gipin dolrang baksa Simanaguri songo songni manderang baksa jinma tom·bimonganiko ong·atangaha aro manderangni nangnikanirangko ra·chenggija Meghalaya a·dokni mitam songrangko Assam-o napatna tik ka·ahani gimin dolgni sorkarirangni kosako raken jegalanirangko dakangtokaha.
Ia tom·bimonganio Garo Hills-oni re·anggipa dingtang dingtang dolni dilgiparang, jinmana aganprakengon, iani bidingo uamang Meghalaya a·dokni Chief Minister Conrad Sangma-ko grongenba, ia MoU-ko den·galpilchina didigen ine ku·rachakaniko on·angaha.
Uamangni mol·molaniko Meghalaya sorkari aro chief minister knachakjagenchimode, Garo Hills-osan ong·aigija Khasi Hills a·jaoba dingtang dingtang dake jingjengatanirangko dakanggen ineba dingtang dingtang dilgiparang parakangaha.
Ia tom·bimonganio KSU Riangdo circle-ni dilgiparangba jinmana aganprakengon, iani bidingo uamang Garo Hills-ni NGO-rang baksa bakrimaniko on·anggen ine ku·rachakaniko on·angskaaha.
Indake ong·engon, dolgni sorkarirangni soi ka·grikgipa MoU-ko den·galpilchina dabie Budbar salo, Simanaguri-oni Sildubi songona jinma re·jomaniko ong·atanggen ineba ia tom·anio NGO-rang tik ka·e donangaha.
Assam-M’laya sorkarirangni soi ka·grikgipa MoU-ko den·galpilchina NGO-rang dabia
Date:
Share post:
