AMPATI: Budbar salo, Selsella constituency-ni MLA aro Meghalaya State Council on Climate Change & Sustainable Development-ni Chairperson Ferlin CA Sangma, Ginger Mission, Spice Development Scheme-ni ning·o e·ching ge·e man·aniko bariatna gita South West Garo Hills a·jani game ge·e cha·giparangna e·ching bitchilrangko suale on·angaha. Ia program-ko SWGH a·jani District Horticulture department-ni gita Ampati-o ong·atangaha aro tom·anio MCCL-ni Vice Chairman Dabo Mrong Marak, SWGH a·jani Additional Deputy Commissioner AVD Shira aro gipin officer-rangba dongpae bak ra·angaha.
Skangode Meghalaya a·dokba e·ching ge·e man·anio a·song gimiko gnigipa ong·achim indiba ka·sinsin Meghalaya a·doko e·ching man·anirang komiroroangahani gimin a·doko e·ching ge·aniko bariatna gita sorkari nangnike, dingtang dingtang program-rangko ra·gatna a·bachengahachim. Ia miksonganio, a·dokni Chief Minister Conrad K Sangma, ia 2022 bilsini March jao ong·atanggipa Assembly Budget Session-o Ginger Mission-ko a·bachengate on·angaha.
Ia 2022-23 bilsini gisepo Meghalaya a·dok gimiko komibeoba hectare 2000 a·arangko ia Ginger Mission-na jakkalgen aro ianoni hectare 100-kode South West Garo Hills a·jao jakkalna sienga. Iana South West Garo Hills a·ja gimikoni dam 60 chimonggimin songrangko seokmanaha aro ia Mission-ni ning·o sak 500 game ge·e cha·giparangko seokmanaha.
Ia program-ko ong·atanio Selsella constituency-ni MLA, jinmana aganprakangengon, Ampati Civil Sub Division-ni somoio ua an·tangan bilsi bongamangna Civil SDO ong·e kamko ka·angaha aro ian una noktangona re·bapilani gitasa ong·enga ine South West Garo Hills a·jani manderangko grongpiltaina gita an·tangni kusi ong·aniko parakangaha.
Ia Ginger Mission-ko sorkarini a·bachengatani miksonganiara, iachi game ge·e cha·giparangni janggi tanganiko tang·doatanian ong·enga ineba Sangma aganaha.
E·chingni gamchatgipa ong·ani bidingo talatanirangko on·angengon, e·chingrangko bang·bate man·enba Meghalaya a·dokko a·songo e·ching man·batgipa a·dok ong·attaina gita sorkarini on·enggipa cholrangko ra·china ua game ge·e cha·giparangko didiangaha.
Ia tom·anio dongpae jinmana aganprakanggipa gipin manderangara, Ampati-ni District Horticulture Officer D Nongkhlaw, Horticulture-ni Assistant Director B Ch Marak aro gipinrang ong·a.
