SHILLONG: BJP, uamangni election manifesto-o ILP-ni mamlako napatgen, unigisepon Meghalayani manderangna ILP-ko nangnikmanchaode da·ochachan BJP-na chakpaaniko on·china ine State BJP Chief Ernest Mawrie Sonibaro aganaha.
BJP-ko bil-sasonona sokatode ILP-ko on·gen ine ku·rachakgenma ine sing·engon, ‘‘Ian chingni manifesto-ni bak ong·gen, ukode manderang chanchie niaichinaha’’ inesan Mawrie aganaha.
A·doko ILP-ko ra·gatchina gita dabianira ian ru·uta somoirangonin donchipenggipa ong·a ine aganengon, iarangni bidingo party, pil·tai April 20-ni ja·mano ma·mong dilgiparangko gronge chanchirimtaigen ine A·dok BJP dilgipa aganaha.
“Chinga chingni programrangna ja·ku de·chakatengahani gimin da·o april 20 ja·mano, chinga ma·mong dilgiparangko grongenba ia mamlarangni bidingo agangrikangtaigen,” Mawrie aganaha.
A·doko ILP-ko ra·gate on·china gita Meghalaya Legislative Assembly-o mingsa resolution-ko ra·chakmanaha aro ILP-ko ra·gatna nangnikanikoba seataha ine gisik ra·ataniko on·engon, ia mamlarang ma·mongni jako ong·enga, jemangan iako nirokchengenga aro iani bidingo dingchikmanchae ja·ku de·ani dongkujaenga, Mawrie aganaha.
“Chinga a·dokni manderang baksan, maina a·dokni bang·bata manderangan ILP-ko ra·gatako nangniktokenga,” BJP dilgipa aganaha.
