SHILLONG: East Khasi Hills a·jani Mawnianglah songni manderang chirangko chu·onga gita man·jaengani gimin dingtangmancha Water Conservation Tank ba chi chimongchakani tengkiko rike on·aha aro ia tengkiko Sonibar salo, Mylliem constituency-ni MLA aro a·dokni C&RD Minister Hamletson Dohling-ni jakchi kulie on·angaha.
Ia tengkio litre 1,48,420 chirangko chimongna man·a aro iako District Mineral Fund-ni ning·o gong lak 17.50 koros ong·e rikahachim.
Ia chi tengkiko kulie on·angani somoio a·dokni C&RD Minister aro joltangni MLA, jinmana aganprakangengon, ia tengkiko rikanichi Mawnianglah-o songdongenggipa bang·a nokdangrangnan ringani chirangko on·na man·gnok ine parakangaha.
“Mawnianglah songo ringani chirangko man·jaengani gimin songni manderang namen neng·nikanirangko man·tokna nangengachim indiba da·o ia litre 1,48,420 chakgipa chi tengkiko rike on·na man·ahani gimin ian Mawnianglah songo songdongenggipa manderangna namen katchaani somoi ong·enga. Ian songni manderangna ringanikosan on·aigija dingtang dingtang kamrangnaba chu·onga gita chirangko on·na man·gnok,” ine Dohling parakataha.
Ia chi tengkiko rikna gita a·arangko on·gilahani gimin aro ia tengkiko somoi gita matchotatna PHE department baksa nangrime kamko ka·ahani giminba ua dingtangmancha Mawnianglah songni manderangko mittelpilangaha.
