TURA: Mongolbar salo, BOP Baluaghat-o donggipa 28 Bn BSF-ni sipairang, Bangladesh a·songoni niam gri matchu badingenggipa mande saksako, sima ari gita Bangladesh a·songona matchu cha·uangengmitingko rim·na man·aha aro ia mande baksana matchu manggnikoba rim·rikna man·aha.
BSF doloni u·iatani gitade, ia apsan salon, Bollonggre songo dakait dakani gimin aro matchu manggisiko cha·uani gimin koborko man·soenba, BSF dolni dolsa sipairangko ua biapona watataha aro ua biapo BSF-ni sipairang, dolsa matchu cha·ugiparangko aro adita matchurangkoba nikeaha. Ia matchu cha·ugiparangko BSF dolni sipairang rikenba ja·mano uamangoni saksako rim·rikna man·aha indiba gipinrangde ua jolo a·briari aro buringrara dakani gimin joke katangna man·aha.
Rim·ako man·gipa mandeara, Bangladesh a·songni Kurigram a·jao donggipa Beparipara songni bilsi 24 ong·gipa Humayun Kabir ba Saddam ong·achim ine BSF official-rang parakataha.
Ia matchu manggniara Garagre songni Methen Marak aro Arjun Sangma-ni ong·achim ine ja·mano songni manderang, BSF dolni sipairangna parake on·aha.
Ia apsan dolni manderangan, Sombar aro Mongolbar walni gisepo Khalek R Sangma minggipa mandeni dokkankoba dakait dakaha aro dokkanni tangka paisarang baksana gipin gamchatgipa bosturangko ra·e katangaha ineba songni manderang, BSF dolni sipairangna parakataha.
Rim·a man·gipa mandeko BSF-ni sipairang, sing·sandion, batanggimin somoirangoba ua sima ari jolrango ong·gija kamrangko ka·anio jak dongachim ine ku·rachakaha.
Rim·a man·gipa mandeko aro gipin bosturangko ja·mano BSF-ni sipairang, police-rangna pakwate on·ataha.
