TURA: Adita salrangna skang, ‘Easter Monday’-ko manianio Garo Hills-ni dingtang dingtang biaprango a·sel ong·e saksni chadamberang, janggitangtangko gimaatna nangahani gimin mikrakataniko on·na gita Bristibar salo, West Garo Hills a·jani District Administration, Tura-ni Mothers Union baksa nangrime dingtang dingtang dolrang baksa Tura-o tom·aniko ong·atangaha.
Ia tom·aniko West Garo Hills a·jani Deputy Commissioner Ram Singh-ni office chamber-o ong·atangaha aro ia tom·anio sorkari official-rang, dingtang dingtang mondolini dilgiparang, Nokma Council-ni dilgiparang, skigiparang aro gipin dolrangba dongpae bak ra·angaha.
Ia tom·aniko ong·atani bidingo Deputy Commissioner, tom·bagiparangna talataniko on·angengon, iandake maniani salrango, manderangni rochakgipa aro picnic cha·chakgipa biaprango skatang cha·e ringe roaniko champengna gita iana skangba dingtang dingtang dolrang baksa tom·e chanchirimangahachim ine parakataha.
Maniani salrango chadamberangni ong·gija dake roanirangko champengna nangengani gimin janapangengon, chadamberangna chio jroaniko skie ra·na gita swimming pool-rangko, somoirangko re·atna gita robol kal·chakani biaprangko tarie on·na nangengani gimin aganangenba, songsalo chadamberangna simsak nirokaniko on·china gita Ram Singh, ma·a paarangko aro ja·delgimin manderangko didiangaha.
Ia tom·anio Mothers Union-ni president-ba jinmana aganprakengon, da·ororo chadamberangni gisepo so·sojengjeng ong·anirang batroroengahani gimin chadamberangni skatang roanirangko nambate nirok sandina nangengaha ine didianiko on·angaha. Ua salo ong·gipa a·selrangni video-rangko social media-rangko watjojoengani giminba ua an·tangni suk ong·gijaniko parakangaha.
Ia tom·anio, dingtangmancha skulrangko aro songrangko nirokna gita committee-rangko songani bidingo, chu dokkanrang batrorobaengani gimin chu dokkanrangko champengna, Nokmarangna aro songni dilgiparangna awareness program-rangko ong·atani bidingo aro uandakgipa dingtang dingtang kamrangni giminba dingtang dingtang dolrang apsan chanchirimangaha.
