Adhoc skigiparangni dabianiko knachakjaengani gimin NCM-ko a·bachengata

SHILLONG: Meghalaya a·dokni adhoc skulrango skigiparangna dormahako gong 18,000-chi bariatna aro 5 percent ka·e bilsio bariatchina dabianiko chu·sokatna gita a·dok sorkari, seachi ku·rachakaniko on·jaengani gimin Federation of All School Teachers of Meghalaya (FASTOM)-ni ning·o skigiparang, mijal Sukrobar sal dipet Non-Cooperation Movement (NCM)-ko a·bachengatan baksana jinma tom·bimonge sorkarini kosako jegalanirangkoba dakangaha.
Sukrobar salo, adhoc skulrango skigiparang, a·dokni Secretariat mikkangona re·ange sorkarini kosako jegalanirangko dakangaha aro uamangni dabianirangko chu·sokatchina gitaba dabiangtokaha.
FASTOM-ni dilgipa Mayborn Lyngdoh-ni kobor ra·timgiparangna parakatani gitade, adhoc skulrango skigiparangna dormaharangko bariatchina aro adhoc skulrangko deficit-ni gadangona ra·doatchina dabie skigiparang, re·anggipa March 23 tarikonin, jinma tom·bimonganirangko ong·ate sorkario dabiengachim.
FASTOM-ni dilgiparang, School Education & Literacy-ni Director Ambrose Marak baksa tom·e chanchirimani somoion adhoc skigiparangni dormahako gong 18,000-chi bariatna aro bilsio 5 percent ka·e bariatna gita sorkarina proposal-ko on·gen ine dolgni songgigrikaniko dakahachim indiba Education official, ia proposal-ko a·dok sorkarina watatchipkujaenga ineba Lyngdoh parakataha.
Adhoc skulrango skigiparangni dabianiko sorkari nigen ine 2019 bilsio ku·rachakaniko chu·sokatchipjaengani gimin ua a·dokni Chief Minister Conrad K Sangma-koba matnangataha.
“Bilsi gittamni gisepo sorkari chingna mamingkoba dakjaha. Uni gimin chingni dabianirangko nienga ine Chief Minister aro Education Minister Lahkmen Rymbui-ni agangipa kattarangko chinga bebera·na man·jaha,” ine FASTOM-ni ku·wattimgipa aganaha.
Iani bidingo seachi ku·rachakaniko on·china gitaba ua sorkario dabiangaha.
Batanggimin bilsidokni gisepo Education-ni 3 percent tax-ko maikai jakkalaha, uko che·em che·em talate on·china gitaba Lyngdoh, a·dok sorkariko didiangaha.
“Re·anggipa bilsini Budget Session-ode adhoc skigiparangni kamko ra·dona gita gong kror 500-ko nangdapgen ine Education Minister Lahkmen Rymbui aganahachim indiba ia bilsiode gong kror 700-ko nanggen ine aganskaaha. Bilsisani gisepo maikai kror 200-ko man·dapaha chingade ma·sijaha,” ine Lyngdoh aganaha.
Uamangni hisapni gitade, skigiparangna dormaharangko bariatanio gong kror 250-oni gong kror 400-mangonasan tangka paisarangko nangdapaigen ineba Lyngdoh aganaha.