TURA: Re·anggipa Bristibar attamo, South Garo Hills a·jani police-rang, Yaba samrang baksana mande sakbriko Baghmara-o rim·na man·aha.
Koborko on·ani gitade, ia manderang ia Yaba Tablet-rangko Bangladesh a·songona watatna gita Baghmara-ni Malikhona gittimona ra·angengachim indiba police-rang iani bidingo koborko man·soenba, ia manderangko aro uamangni ra·angenggipa samrangko rim·na man·aha.
“Ma·sina man·gijagipa manderang, pekatgipa samrangko Bangladesh-ona watatna gita Baghmara-ni Malikhona gittimona ra·baenga ine chinga Bristibar attamni 6:00 bajimango koborko man·soaha aro uandaken ia biap gita re·ruraenggipa garirangko nirikkienba ja·mano ia manderangko rim·na man·aha. Ia manderangoniko sandion, gram 20 ong·gipa rong 198 Yaba samrangko man·aha,” ine South Garo Hills a·jani SP Rituraj Ravi, kobor ra·timgiparangna parakataha.
