HNLC-ni gitcham dilgipa Thangkhiew-ko so·otani a·selko sandianiko matchotata

SHILLONG: Gitcham HNLC dilgipa Cheristerfield Thangkhiew-ko so·otani a·selrangko sandianiko ba uamangni hearing-ko dakaniko mijalo matchotataha.
Indake report-ko tarina gita da·o somoirangko nangkugen ine Justice Vaiphei aganaha.
“Report-ko tarina gita baditana somoiko nanggen ukode anga aganna man·kujawa indiba anga man·nadipet seng·gnatna jotton ka·gen aro ra·doatgimin May 20 tarikni gisepon report-ko on·na jotton ka·gen,” Justice Vaiphei aganaha.
Ja dok batpile ru·uten a·selrangko sandianirangko dakanio, police personnel aro Cheristerfield Thangkhiew-ni nokdangni manderangko man·chape sak 12 sakkirango Commission sing·anirangko dakangaha.
Commission, chang 20-na batpilen hearing-rangkoba dakaha.
Re·anggipa August 13 tariko Shillong-ni Kynton Massar gittimona re·ange operation ka·dilgipa East Jaintia Hills Superintendent of Police, Jagpal Singh Dhanoa-ko man·chape, adita sorkarini sakkirangoba Commission sing·sandianiko dakaha.
Manderangni jegalaniko dakenba, gitcham HNLC dilgipako so·otani a·selrangko sandichina dabiani gimin, a·selrangko sandianiko dakchina August 16 tariko ge·etaniko on·manahachim.
Inquiry ba sandiani bak gita dake, Justice Vaiphei so·ota man·giparangni nokdangonaba February 5 tariko re·angahachim.