MDC, Meghalayana university-ko dabia, CUET-de ranta ka·kugijagipa ine agana

TURA: A·dokni chatro chatrirangni namgnina aro uamangni mikkangchi janggi tanganina, ia Common University Entrance Test (CUET)-ko drae ra·gatana batede Meghalayana damsa university-ko kulibo ine North Garo Hills-ni Rongrong MDC Rinaldo K Sangma, A·dok sorkariko didiaha.
Indake CUET-ko dra·e ra·gatgenchimode, chatro chatirang neng·nikaniko chagronggen ine janapaniko on·enba, CUET-ko ra·gatdraana batede a·doko university ge·sako kulichina gita ku·pattianiko on·enba, Rongrong MDC, education minister, Lahkmen Rymbui-na chitti seataha.
Dal·batgipa neng·nikani uan online porikkarangko sechakram centre-rangon ong·aigen, Tura, Shillong, Guwahati ba Ri-bhoi da·o gital kuligipa centre-o badita ge computer-rang donggen, uni gisiko chanchie sing·anirangko dakaha.
“North Garo Hills mangmangon, session ge·saon hajal bate HSSCL porikkako pass ka·anggiparang donga. Ia centre-rango  ge 50 computer-rangsan dongaiode, pring attam porikkarangko seatgenchimoba sak 400 chatro-chatrirangnasan porikkako seatna man·aigen. Indide Garo Hills-nan badita salko nanggen aro a·dok gimiknade badita salkon nanggnok? Chatro chatrirangara ia porikka sechakram centre-rangona korostangtangchi re·e porikkarangko sena chol ong·tokgenma,” MDC sing·doaha.
Rinaldo-ni chanchiani gita neng·nikaniko namatanide uan Meghalaya a·dokna ge·sa university-ko kulianian ong·engachim.
“Assam-ode UGC Act-ni ning·ogipa kuligipa Assam Don Bosco University aro Assam Down Town University ia ge·gni state private university-rang dongaha aro college-rangde kona noksik damantion dongaha. Meghalayao da·odipet ge·skumang private university-rang donga jerangkon UGC Act-ni ning·o chananako man·enga. Indiba an·chingni gimik college-rangan ong·nasipile North Eastern Hill University (NEHU) baksa chapatako man·gipa ong·a aro private university-rangoni darangba dongja,” ua aganaha.
Rinaldo indakeba aganaha je sakantide NEET, JEE ba CLAT dakgiparangchi professional course-rangko dakna sikgiparang ong·ja. Mitamrangde ramram ong·gipa ba general course-rangko dakeba teachers ba skigiparang ong·na sikgiparangba donga.
“Ia CUET-de, songadamni cholgri apgrigipa chatro chatrirangni dal·e chue poraina miksonggiparangko neng·nikatgen aro ja·donggaattelgen,” MDC agandapaha.

Get real time updates directly on your device, subscribe now.

Comments are closed.