SHILLONG: National People’s Party (NPP)-chi dilenggipa MDA sorkariko be·atna gita AITC aro dingtang dingtang dolrang baksa bakrimna jotton ka·enga ine jangbingbanganiko Robibar salo, MDA sorkario bak ong·paenggipa United Democratic Party (UDP) jegalatenba, uamang MDA-o bon·kamgipa somoionan kakket ong·e dongangkuaigen ine parakataha.
“Iandake jangbingbangataniara bebera·na man·gijagipa kattarangsan ong·aia maina chinga UDP dolni gitade, pangnan ku·mong nangrimanio aro kim·kimgipa sorkariko rikaniosa bebera·a. Chinga batanggimin bilsibrina apsan nangrime sorkariko rikaha indide da·o somoi bon·angachibarasa wate katgenma?” ine UDP-ni general secretary Jemino Mawthoh sing·doataha.
Ian manderangko jajaatna saniba chalakki dakanisan ong·aia ineba ua parakataha.
“Da·o dipet chinga UDP-ni gita iandakgipa maming chanchianirang dongja aro ian badiaba dolrangni manderangni gisepo jajaataniko ra·bana miksonganisan ong·enga,” ine Mawthoh aganaha.
Sorkariko rikna gita kim·kimaniko nangani gimin UDP dolde pangnan kim·kimaniko on·na jotton ka·gipa dolsa ong·a ine janapatengon, “Chinga pilak dakgipa sorkarirangkon nikmanaha aro chingo membor-rang bang·pajaoba chinga pangnan kim·kimgipa sorkariko ong·atna gitasa jotton ka·ronga,” ine UDP-ni general secretary parakataha.
Kakket ong·e donganichin 2023 bilsio UDP dolna pattianirang sokbagen ineba Mawthoh aganaha.
AITC dol, UDP baksa bakrimna jotton ka·engama ine sing·on, da·o dipet AITC-oniba iandakgipa ja·ku de·anirang dongkuja ine Mawthoh parakataha.
