TURA: North Garo Hills a·jani Bajengdoba C&RD Block-na gital building ba nokko rikna gita mijal Bristibar salo, a·dokni Chief Minister Conrad K Sangma-ni jakchi pangchakaniko songe on·angaha aro ia gital nokna pangchakaniko songe on·anganio Assembly-ni Deputy Speaker Timothy D Shira, Bajengdoba-ni MLA Pongseng Marak, Kharkutta-ni MLA Rupert Momin, MDC-rang, gitcham MDC-rang aro gipin dilgiparangba dongpae bak ra·angaha.
Bajengdoba Block-ni gita nokko rikna gita pangchakaniko songe on·angani somoio a·dokni Chief Minister, jinmana aganprakangengon, a·dokni dam 46 block-rango gital building-rangko rikna gita a·dok sorkari, gong kror 121 tangkarangko chame donmanaha ine parakataha.
Bajengdoba C&RD Block-ni gital building-ko rika matchotahaode a·jani officer-rang nambate kamrangko ka·na man·gnok aro ian dingtang dingtang kamrangko ka·anioba dakchakani ong·gnok ineba Sangma parakataha.
Sorkarini kamrangko manderangona sepangbatatna gita sorkari raken kamko ka·enga ine janapatengon, ia jolrango donggipa manderangna an·seng baljokanirangko on·na man·na gita sorkari, Bajengdoba PHC-ko bakan CHC-ona ra·doatgnok ine Chief Minister parakataha.
Iani ja·mano ua, Bajengdoba-ni Bakenang Nalsa-o rikenggipa Mini Stadium-koba niangjolaha aro ia stadium-ko somoi gita matchotatchina conractor-rangko ge·etangaha.
