SHILLONG: Congress doloniko ra·gala man·gipa MLA sakbonga, Opposition All India Trinamool Congress (AITC)-ni dilgipa Mukul Sangma aro gipin MLA-rangba, doltangtango kusi ong·jaenga ong·ode BJP-o napeskana man·gen ine Sonibar salo, BJP-ni dilgipa AL Hek parakataha.
“Dr Mukul Sangma aro AITC-ni gipin member-rangko man·chape dingtang dingtang political dolni dilgiparangko chinga rimchaksoenga. Ia dilgiparangna chinga chingni do·gako oe donenga aro uamang nangnikgenchimode ching baksa apsan nangrime re·chakatna man·gen. Chinga a·dokni manderangna namgipa sorkariko on·na nangnikenga,” ine Hek parakataha.
Da·o dipet Congress dolni MLA-rang darangba BJP-ona re·bae agangrikea dongkuja ineba ua talataniko on·angaha.
“Uamang re·bagenchimode angan uamangna do·gako oe on·soaigenchim. Uamangko chinga rimchaksoenga,” ine Hek aganaha.
Meghalaya a·doko Congress dolni sakbonga MLA-rang, gipin dolrango napskana miksongtokengahani gimin uamangko ma·mongo Congress dolni dilgiparang bilsi gittamna ra·galgenchimoba uamangna maming nangchakeani dongskajaengahachim.
BJP dolni bak ong·paenggipa MDA sorkarina chakpaaniko on·ahani gimin ia sakbonga MLA-rangko Congress doloniko ra·galahachim.
BJP-ni dilgiparang uko BJP-o napchina didienga ineba ua BJP-o napna jechakaha ine adita salrangna skangsan AITC-ni dilgipa Dr Mukul Sangma parakatahachim.
BJP dolni kosako AITC aro Congress dolrangni nangrime chakatani gimin janapatengon, pilak political dolrangan an·tangtangni daitorang donga aro iani bidingo ua mamingkoba aganna nangani dongjawa ine Hek parakatskaaha.