RESUBELPARA: North East Festival 2022 – Azadi Ka Amrit Mahotsav-ni bak gita Sombar salo, North Garo Hills District Administration-ni gita Self Help Group (SHG) Mela baksana Financial Literacy Camp aro District Level Quiz Competition-ko Resubelpara-o ong·atangaha.
Ia program-ko ong·atanio North Garo Hills a·jani ADC aro DRDA-ni Project Director ZJ Sangma, mongsonggipa sokgipa ong·e jinmana aganprakangengon, SHG-rangni aro bading chiwalani gamchatgipa ong·ani gimin jinmana talate on·angaha.
SHG-ni bading chiwalanirangchi manderangna janggi tangani cholrangko on·skana man·gen ine janapatengon, an·tangtangni kamrangko gisik nangbate ka·china aro sorkarini on·enggipa dakchakanirangko ra·china gita ia program-o bak ra·gipa dingtang dingtang SHG-ni membor-rangko didiangaha.
Ia program-ni bak gita district level quiz competition-ko ong·atanio chegipa chatro chatrirangna an·tangni namgipa skaniko parakangengon, mikkangchiba an·tangtangni kamrango bimchipgiparang ong·china gita Sangma, chatro chatrirangko didiangaha. Ia quiz competition-ko ong·atanio skanggipa boksisko Dilma A·pal Higher Secondary School, gnigipako Riverside Higher Secondary School aro gittamgipa boksisko Resubelpara Girls Govt Higher Secondary School cheangaha aro uamangna boksisrangko Sangma-ni jakchi suale on·angaha.
Ia program-ko ong·atanio dongpae bakko ra·anggipa gipin manderangara, Planning-ni Research Officer BK Sangma, SBI, MCAB aro Meghalaya Rural Bank-ni branch manager-rang aro gipin officer-rang ong·a.
