TURA: Garo Hills-o rikenggipa Model Residential School-rangko nina gita Meghalaya Legislative Assembly-ni Estimate Committee, salgittamna Garo Hills-ni dingtang dingtang biaprangona re·roroenga.
Ia Estimate Committee-ni membor-rangara, North Tura-ni MLA Thomas A Sangma, Gambegre-ni MLA Saleng A Sangma, Williamnagar-ni MLA Marcuise Marak, Mendipathar-ni MLA Marthon Sangma aro Chokpot-ni MLA Lazarus M Sangma ong·achim.
Ia Estimate Committee-ni Model skulrangko re·roroe nianio Selsella C&RD Block-ni ning·o donggipa Nengkalpara songo, matchotgija dongenggipa skul damsako nikna gita man·aha. Koborko on·ani gitade, ia skul nokko rikna a·bachengaoni matchotgija bilsi 5-na galchipe donahachim.
Estimate Committee-ni membor saksa Marthon Sangma-ni u·iatani gitade, Sukrobar salo uamang South Garo Hills a·jaona re·angon, Siju-oba apsan daken rika matchotgija galchipe donenggipa model skul damsako nikeaha.
“2012 bilsio dam 9 model residential skulrangko rikna tangka paisarangko chame on·ahachim indiba ia dam 9 skulrangkon matchotkujaenga. Aiao inmananide ia damskul skulrangoni damchetkode Williamnagar-ni mande saksana on·ahachim indiba da·onan uamang skul nok damsakoba matchotkujaenga,” ine Marthon Sangma parakataha.
Iani bidingo Education department-ni official-rangko sing·sandion, contractor-rangna 70 percent tangkarangkode on·manahachim indiba kamrangko da·onan matchotkujaenga ine uamangna talataniko on·aha ineba Estimate Committee-ni membor-rang parakataha.