Shillong pollution test ka·ani centre-rang dongjae neng·nikako man·enga

SHILLONG: A·songni gipin songjinmarango garirangko test ka·na dingtang dingtang chol donga indiba Shillong songjinmao ge·gnisan test ka·ani centre-rang dongaia, garirangara salsa batbat bang·rikrikbaenga.
Shillong songjinmao ge·sasan pollution test ka·ani centre Motinagar-o Meghalaya State pollution Control Board-ni office-o dongaia.
Sombaoni Sukrobar-ona ua biapo garirangni pollution obostako manderang chek ka·na man·aia indiba uan manderangna neng·nikani ong·chongmota maina manderang tanggitik office donggija salrango pollution test ka·na re·angna nangenga.
Maibakai Mawiong-o ge·gipin pollution test ka·ani Centre donga jean Sonbibar-rango sal 12 bajiona kingking kulia.
Pollution test ka·ram centre-ni ua uni dokkanko Robibar-o kuliaia ine aganani ja·mano manderang una senge uno line dakan bakropila.
Minggipin ge·gipin chongipa pollution test ka·ani centre Mawiong petrol pump-o ge·sa donga indiba uara chipkamaia.
Ra·gatgimin Motor Vehicles Act-ni ning·o PUC-ni niamko pe·a ine gong 10,000 daiko gamna aganenga. Skango skanggipa niam pe·ao gong 1,000 aro changgipino gong 2,000-ko donaha.
Shillong-o Shillong Traffic Police pollution certificate-ko raken amenga indiba bang·bata manderangan Assam-ona Assam Police-ni adita rake sason ka·ani gimino pollution certificate-ko ra·na Assam-ona re·angenga.
“Chinga Robibar Guwahati-ona re·angna miksonga aro da·al Sonibar-o donga, Anga test ka·na re·angna man·ja indiba maibakai Mawiong-ona re·angna man·achim,” manderangoni saksa aganaha.
MV Act-ko ra·gatani a·selo Motinagar-ni pollution testing centre chakjapilenga.
Gipin a·dokrango pollution testing centre-rang rama dilmarangon dongaia manderang test ka·na re·angna man·aia indiba Shillong-o indake ong·ja.
A·dokni bang·a district-rango da·alona kingking pollution centre ge·saba dongja aro sorkariba kulieba on·ja, ku·rachakakon chu·sokateba on·ja ine manderang aganaha.