SHILLONG: Meghalaya a·doko joa kal·aniko aro mongsongbate online gaming-ko niamo ong·atna gita Meghalaya sorkarini State Regulation of Gaming Act 2021-ko ra·gatna tik ka·aniko toromni dilgiparang aro a·doko songdongenggipa manderang raken jegaltokengon, Sombar salo, Hynniewtrep Youth Council (HYC)-ni dilgiparangba, a·dokni Deputy Chief Minister Prestone Tynsong-ko gronge ia niamko ra·gatjachina didiangaha.
Deputy Chief Minister-ko grongani ja·man kobor ra·timgiparang baksa agangrikengon, a·doko joa kal·aniko niamo ong·atna tik ka·aniko dingtang dingtang toromko dilgiparangba jegaltokenga aro ia jegalanio HYC-ba chakpaaniko on·enga ine HYC-ni general secretary Roy Kupar Synrem parakataha.
“Meghalaya a·doko skangonin Teer aro lottery-rangko kal·ani gimin mingsingmanahani gimin chinga a·dokko joa kal·gipa a·dok ine biming man·atna sikchongmotja,” ine ia Meghalaya State Regulation of Gaming Act baksa gipin niamrangko ra·galpilchina HYC-ni dilgiparang dabiangaha.
Meghalaya Gaming Commission-ni chairman-na Allahabad High Court-ni gitcham Judge-ko seokmanaha ine HYC koborko man·soaha indiba ia pilak niamrangkon ra·galpilna nanga ineba Synrem, a·dok sorkario dabiangaha.
Niamo pangchake Gaming Commission-de dongkamnagipasa ong·achim ine janapatengon, ia niamo joa kal·atani biaprangkoba name janapa dongja ine HYC parakataha.
“Ia niamo janapani gitade, bilsi 18 ong·gipa manderang joa kal·anio bakko ra·na man·gen indide joako kal·anio maikai gipin biaprangoni manderangsan kal·na man·aigen ine sorkari aganna man·a?” ine Synrem sing·doangaha.
Joa kal·aniko niamo ong·atanichi sorkari kajina man·aniko bariatna man·gen ine agananiko jegalatengon, iandake joa kal·aniko niamo ong·atani pal sorkari, festival ba manianirangko ong·ate koros ong·ani pal gipin cholrangchi kajina man·dapanirangko sandina man·aigen ine HYC parakataha.