TURA: Mongolbar salo, a·dokni Forest & Environment Minister aro Dadenggre-ni MLA James K Sangma, Dadenggre Civil Sub-Division-ni ning·o, Asian Development Bank (ADB)-ni dakchake on·anichi gital rikgipa Dilsigre Secondary School-ni nokko nokdonggae on·angaha aro ia skul nokko nokdonggae on·ani somoio Dademggre-ni Civil SDO Vibhor Aggarwal, District School Education Officer R Tenang K Sangma aro dingtang dingtang officer-rangba dongpae bak ra·angaha.
Ia gital skul nokko nokdonggae on·angani somoio Dadenggre-ni MLA, jinmana aganprakangengon, Meghalaya a·doko skul nokrangko rikna gita ADB, gong million 100 dollar-rangko chame on·aha aro Dilsigre gita dakgipa songba ia skul nokko man·na gita namen rasong gnanggipa song ong·a ine parakangaha.
Ia gital skul nokko man·anichi chatro chatrirangsan ong·aigija ma·a paarangba bang·a namgnirangko man·gnok ine janapatengon, ADB-ni dakchake on·enggipa skulrangko chu·sokgipa ong·atna gita pilakkon nangrime kam ka·china Sangma didiangaha.
A·doko namgipa lekka porako on·na gita sorkari, daitoko ra·e kam ka·enga ine janapatengon, ia skulan ia jolni chatro chatrirangko mikkangchina tarisamsoani pangchakani gita ong·gen ine Sangma parakataha.
An·tangtangna on·enggipa dingtang dingtang cholrangko ra·e chu·sokgiparang ong·angchina gitaba ua skulni chatro chatrirangko didiangaha.
Ia tom·anio Dadenggre-ni Civil SDO Vibhor Aggarwal-ba jinmana aganprakengon, ia skulo chatro chatrirangna namgipa lekka porako on·na gita dingtang dingtang cholrangko on·aha ine parakangaha.
Ia salo, adita salrangna skang, best state exhibit-ni award-ko man·gipa Gregory Ch Marak-naba certificate aro tangkako boksis dake on·angjolaha.
