SHILLONG: Meghalaya a·dokni adhoc skulrango skigiparangni dabianirangni bidingo a·dokni Chief Minister Conrad K Sangma baksa agangrikna gita Federation of All School Teachers of Meghalaya (FASTOM)-ni member-rang, Mongolbar saloba Main Secretariat sambao senge dongahaoba grongna gita cholko man·taijaha.
Iana skang, Sombar saloba uamang Chief Minister-ko grongna dabie, Main Secretariat sambao jingjengatanirangko dakahachim indiba ua somoio Chief Minister, Delhi-oni re·bamiting ong·e skigiparangko grongna man·jahachim. Mongolbar saloba, a·dokni Chief Minister Conrad Sangma, Jaintia Hills a·jao ong·atanggipa Lakadong Festival-o bakko ra·na re·ange skigiparangko grongna somoiko on·taina man·jaha.
FASTOM-ni dilgipa Mayborn Lyngdoh-ni kobor ra·timgiparangna parakatani gitade, Chief Minister biaptango dongjani gimin Education department-ni dal·dalgipa official-rangko grongskana man·gen ine Mongolbar attamo Chief Minister Office (CMO)-oni uamangna phone ka·e aganatahachim indiba Education department-ni Additional Chief Secretary DP Wahlang-an file-ko CMO-na watatmanahani gimin Education official-rangko grongeba maming namgni dongskajawachim.
Skigiparangni dabianiko chu·sokataniara da·o Finance aro Planning department-ni jakosa ong·aha aro ia department ge·gnikon CM an·tangan jako ra·engachim ineba FASTOM-ni dilgipa parakataha.
“Chingni dabianirangni gimin talbate aganna man·gipade Chief Minister-sa ong·engani gimin chinga Chief Minister-kosa grongna nangenga,” ine Lyngdoh aganaha.
Skigiparang, May 1 tarikonin CM-ko grongna gita somoiko bi·engachim indiba Chief Minister, skigiparangna somoiko on·na sikjaenga ineba Lyngdoh parakataha.
Hindi jawilwatrango kal·gipa John Abraham gita dakgipa manderangkon grongna somoi man·genchimoba a·dokni Chief Minister, skigiparangnade somoi on·na man·jaenga ine an·tangni suk ong·gijaniko parakatengon, John Abraham-ko grongani somoioba uamang changgittamna kingking Chief Minister-ko grongna gita CMO-ona phone ka·atahachim ine FASTOM-ni dilgipa parakataha.
“Conrad Sangma, a·dokni Chief Minister ong·genchimode a·dokni manderangnasa somoiko on·chengna nangachim. Indide ua chingni neng·nikanirangko namatna gisik nangbatengama ma da·o gita dingtang dingtang program-rango bak ra·e ronasa gisik nangbatenga?” ineba Lyngdoh sing·doataha.
Indake ong·engon, skigiparang Budbar attam 3:00 bajiona kingking uamangko grongna gita CM-na somoiko on·gen aro 3:00 bajini gisepo ua skigiparangko grongjagenchimode, Shillong, Tura aro Williamnagar-o skigiparangni jinma tom·bimonganiko ong·atna sienggipani bidingo kobor ra·timgiparangna talataniko on·anggen ine FASTOM-ni dilgipa parakataha.
