BAGHMARA: Adita salrangna skang, South Garo Hills a·jao bilsi 50-mang ong·gipa me·chikma saksako bilsi 60-oni bilsi 70-mang ong·gipa Samson A Sangma, drae til·ekna jotton ka·anio chu·sokjahani gimin ka·saninggija dake so·ote galaha.
Koborko on·ani gitade, so·ota man·gipa me·chik aro uko so·otgipa me·asa sakgnian apsan songoni ong·e, saksa sakgipinko namen ma·sigrikachim aro Sonibar salo uamang sakgnian Nongalbibra-o kam nangana re·ange, apsan chu ringahachim. Ua biapo apsan chu ringani ja·man, ua biaponikon chu ra·dape uamang sakgnian songtangona re·chakatangahachim. Songona re·angpilengmiting somoioba uamang biap damsao neng·take chu ringna a·bachengtaiaha aro ja·mano chu pekahaon ia me·asa, ua me·chikko, sikdikdik dakgipa biapona rimange drae til·ekna jotton ka·ahachim.
Ia me·asani uko drae til·ekna jotton ka·on, ua me·chikba uko dakgrikchakaha indiba ja·mano ia me·asa, sambao donggipa ro·ong rongsako ra·e me·chikni skoo dokataha aro ua me·chik ua biapon siaha.
Ia me·chik siaha ine nikon, ua me·asa uni manggisiko chiona galataha aro uni manggisi chio balbojana gita uni manggisi kosako ro·ong dal·ako onjete donangaha.
Ia me·asa chalakki dake ia me·chikni manggisiko chio donangahaoba, ua an·tangni sendal samsakode ua biapon galangahachim.
Sonibar walo ia me·chik noktangona sokangpiljahani gimin uni segipa, May-ni 9 tarik Sombar salo, Nongalbibra police station-ona re·ange missing report-ko on·eaha.
Ia me·chikni gimaani gimin badi ka·aniko man·enba, South Garo Hills a·jani police-rang uko sandina a·bachengataha indiba ia me·chikko man·piljahachim. Indake ong·genchimoba, ia a·sel ong·chakgipa biap sambaoniko police-rang, ia me·chik aro me·asani an·chirara dakgipa sendal samprakko man·skaaha.
Ia biap jolrangoniko police-rang sandiangkuon, ia me·chikni manggisikoba man·aha aro uandaken ja·mano ia me·chikko saming bon·kame nikahachim uko sandie police-rang, Samson Sangma-ni nokona sokangaha. A·bachengode ia mande, an·tangni dosko jechakahachim indiba an·tangni so·otgipa me·chikni manggisiko nikon ua jechae dongna man·jaha. Ia mandeni nokoniko sandiangkuon police-rang, ia mandeni aro me·chikni sendal samprakkoba man·aha.
Dos dakgipa mandeko Police-rang ua somoion rim·aha aro Mongolbar salo bichalna kachariona rimangaha.