TURA: Solid Waste Management ba jabolrangko galani bidingo chanchirimna gita Budbar salo, dingtangmancha tom·aniko West Garo Hills a·jani ning·o donggipa pilak locality development committee-ni president aro secretary-rang baksa Tura-ni DRDA Conference Hall-o ong·atangaha.
Ia tom·aniko a·bachengatanio West Garo Hills a·jani Deputy Commissioner Ram Singh, songtangtango aro gittimtangtango kamrangko ka·dilengani gimin dingtang dingtang gittimni dilgiparangko mittelpilangenba, jabolrangko skatang chiring chibisikrango aro manderangni dongchakgipa biaprango galjachina didiangaha.
Tura Municipal Board-ni gita jabolrangko galna ra·gatenggipa niamrangko ja·rikchinaba ua Tura jillao songdongenggipa manderangko didiangaha.
Ia tom·anio Tura Municipal Board-ni Chief Executive Officer Rikse R Marak-ba jinmana aganprakengon, Tura jillao jabolrangko galna gita niamrangko ra·gatani bidingo aro Rongkhon Songgital-o jabol galchakgipa biapo Refuse Derived Fuel Plant-ko songani bidingo TMB-ni gita Tura jillao songdongenggipa manderang baksa baditaba chang tom·e chanchirimangaha ine parakangaha.
Jabolrangko galengon, noktangtangon soe bon·gipa aro sogijagipa jabolrangko dingtang dingtang dake galna nanggen ine talataniko on·angengon, soe bon·gipa jabolrangkode tangsekgipa garbage bag-rango aro sogijagipa jabolrangkode gisim garbage bag-rango chipe ra·bana nanggen aro ia garbage bag-rangko TMB office-ni reception counter-oniko ra·ena gita man·gen ine CEO parakataha.
Ia ge·etaniko National Green Tribunal (NGT)-ni gitasa on·aha ine talataniko on·angengon, ia ge·etaniko manie noktangtangon jabolrangko bak dake galna nanggen ine Marak parakataha.
CEO-ni parakatani gitade, skanggipa bako, Upper Chandmary, Forest Tilla, Ringrey Gittim, Akonggre aro Gandrak jolrang, gnigipao Wadanang, Jangga aro Alotgre jolrang aro gittamgipao Lower Mission Compound, Lower Chandmary aro ITI jolrangko man·chapanggen.
Jabolrangko bak dake galani bidingo gittimtangtangni manderangna talate on·china gittimni president aro secretary-rangko didiangengon, ia jabolrangko chimongani somoiko jinmana u·iatgen aro jabolrangko ramasamrango gale donaigija joljol jabol chimonggipa truck garirangon on·atna nanggen ine TMB-ni CEO parakataha.
Rongkhon Songgital-o songenggipa Refuse Derived Fuel Plant-ko Korean company songe on·enga aro ia plant-ko re·baenggipa May 17 tariko a·dokni Chief Minister Conrad K Sangma baksana Korea-ni Ambassador, kulie on·anggen ineba Marak parakataha.