TURA: Meghalaya a·doko Aadhar enrolment ba biming segatanirang namen komiengani gimin Meghalaya sorkarini General Administration Department-ni gita pilak a·jarangon dingtang dingtang department-rang baksa nangrime sal 300-na Aadhar Enrolment Campaign-ko ong·atna tik ka·ahani gimin West Garo Hills a·jaoba ia Aadhar Enrolment Campaign-ko ong·atna gita Budbar salo, dingtang dingtang department-rang baksa Tura-ni DRDA Conference Hall-o tom·aniko ong·atangaha.
Ia tom·anio West Garo Hills a·jani Deputy Commissioner Ram Singh, tom·anio bak ra·giparangna aganprakengon, pilak scheme-rangko ra·na aro chatro chatrirangni scholarship-rangnaba India sorkari, Aadhar-ko nangchongmotgipa dakatahani gimin chatro chatrirangko man·chape pilakkon Aadhar-na biming segattokchina didiangaha.
Ia tom·anio Dadenggre Civil Sub-Division-ni SDO (C) Vibhor Aggarwal-ba dongpae, jinmana aganprakengon, Aadhar-na biming segatna nangani gimin aro maikai Aadhar-na biming segataniko 2017 bilsionin a·bachengahachim, uarangni gimin talataniko on·angaha.
Ia 2022 bilsini April jaona kingking West Garo Hills a·jao Aadhar-na biming segatani 67 percent-san ong·engpiti ine an·tangni suk ong·gijaniko parakatengon, Meghalaya a·doko Aadhar-na biming segataniko chu·gimik 100 percent gapatna miksonganiosa a·dok sorkari, dingtang dingtang department-rang baksa bakrime, sal 300-na Aadhar campaign-ko pilak a·jarangon ong·atenga ine Aggarwal parakataha.
Ration card, driving licence, sanna banani, chi pipe salani, labour licence, bank-ni kam aro uandakgipa pilak sorkarini kamrangnan Aadhar nombor-ko nangchongmotgipa ong·gnok ine janapatengon, cholko man·engmitingon bimingrangko segate ra·china manderangko didiskachina gita ua, dingtang dingtang department-ni official-rangko didiataha.