TURA: Garo Hills-ni a·kingrango an·cheng kitaniko champengatengani gimin Tura-ni MDC Bernard N Marak jegalatenba, chiringrangoniko an·cheng kitaniara maming dakeba samtangtango ong·telaigiparangna nangchakeaniko ra·bajawa ine talataniko on·angaha.
Marak-ni parakatani gitade, Garo Hills-ni a·kingrangara Nokmarangni nirok sandianio manderangni gam-jinsa ong·a aro ia a·bri jolrangara Constitution-ni Sixth Schedule ning·o chel·chakako man·gipa biaprangsa ong·ani gimin ia biaprangode a·dok sorkari aro GHADC-ba sason ka·na ba niamrangko tarina bil dongjachim.
“A·brirango songdongenggipa Tribal-rangni kosako a·dok sorkari aro GHADC-ni gitaba maming niamrangko ra·gatna bil dongja. Ia biaprango niamrangko ra·gatengode ba sason ka·na jotton ka·enga ong·ode uan Hill District-o songdongenggipa a·brini Tribal-rangna on·gimin bilko pe·ani gita ong·engaha. Garo Hills-o kacharini ge·etani donga ine a·dok sorkarini a·kanganiara manderangko dilsretna jotton ka·anisan ong·aia,” ine Marak parakataha.
Tura MDC-ni parakatani gitade, a·brirango songdongenggipa manderang, a·kingtangtangonikosa an·chengrangko kitenba kokrango ole, ramasamrango chimongronga aro ukosa garirango dingtang dingtang biaprangona salangskaengachim.
“Chiringrangoniko an·cheng kitaniara maming dakeba samtangtango ong·telaigiparangna nangchakeaniko ra·baja maina chiringrangara jokkame donggipasa ong·ani gimin an·chengrangko man·baaia. Ia manderang maiba ostro ba kolrangko jakkale an·chengrangko kitenga ong·ja aro ianon uamang pangchake janggi tangpaengani gimin iandake an·cheng kitaniko champengataniara manderangni janggi tangani cholko ra·seka gita ong·enga,” ine Marak parakataha.
An·cheng kitaniko niam gri ine parakenba, nangchakegipa department-oniko licence ra·china ge·etaniko on·ani gimin jegalatengon, a·kingo songdongenggipa Tribal-rangni a·jao maikai a·dok sorkarisa licence-ko on·na man·a ine Marak sing·doatenba, ian a·doko kajina man·aniko bariatna kajina gilani gitasa ong·enga ine parakataha.
