SHILLONG/TURA: Meghalaya a·dok gimikon Sukrobar pringonin mikkarang jimbee waangaha aro uandaken a·dokni dingtang dingtang biaprango a·sel ong·anirangkoba nikna man·angaha.
Ia anti a·bachengaonin a·dokni dingtang dingtang biaprango mikkarang waangaha indiba Sukrobar pringonin dontonggija mikkarang jimbee waanganichi a·dokni bang·a biaprangon chi bananirangko aro bol-a·arangni be·anirangkoba nikna gita man·aha.
Shillong songjinmao Sukrobar pringonin mikkarang jimbee waangani a·sel Polo, Demseiniong aro uandakgipa biaprango chi bananirangkoba nikna gita man·aha aro chirang banani a·sel manderang re·ruraanirango neng·nikanirangko chagrongna nangtokaha.
Ri Bhoi a·jaoba Sukrobar pringonin mikkarang jimbee waanganichi, Byrnihat jolo donggipa Umtrew Pabitola jolo dal·begipa bol, autorickshaw bolsako be·dapaha aro bol be·dapanio ia auto-o donggipa manderangoni bilsi 13 ong·gipa me·a bi·sa saksa janggitangko gimaatna nangaha.
Ia a·sel ong·anio auto-ko saltimgipa aro auto-o gadoenggipa sakgipin mandeba saknaanirangko man·na nangaha aro saknaa man·gipa manderangko police-rang, sanna gita Byrnihat PHC-ona ra·angaha.
Koborko on·ani gitade, Sukrobar pringonin dontonggija mikkarang jimbee waanganichi Kynshi chibimaba dal·bae ramarangko mripaha aro uandaken Tura-oni Shillong-ona re·angenggipa garirangba ramaon jachange dongna gita nangtokaha.
Indake ong·engon, Garo Hills-ni dingtang dingtang biaprangoba mikkarang jimbee waanganichi bang·a biaprangon chibimarang dal·bae chi banna a·bachengahani gimin official-rang, manderangko mikrake dongchina u·iataha.
Pangna bilsian da·o gita wachini somoio West Garo Hills a·jani a·kawe jolrango chi bananirangko nikna man·rongenga aro Sukrobar saloba Selsella jolrango chirang dal·bana a·bachengahani gimin jolo songdongenggipa manderangko aro ia jol gita songreenggipa manderangko mikrake dongchina aro skatang songrejachina West Garo Hills a·jani Deputy Commissioner Ram Singh u·iataha.
East Garo Hills aro South Garo Hills a·jarangoba Simsang chibima rang·san dal·bana a·bachengahani gimin chibima rikamrango donggipa manderangko mikrake dongchina aro ramarango ka·sine garirangko salchina gita official-rang u·iataha.
