TURA: A·dokni Chief Minister, Conrad K Sangma, May 14 tarik Sonibar salo Pradhan Mantri Jan Vikas Karyakram of Ministry of Minority Affairs-ni gita Rongram C&RD Block-ni ning·o ga·akgipa Dumindikgre songo PA Sangma Medical Skill Hunar Hub-ko rikna pangchakani ro·ongko song·e on·angaha. Jeon Chief Minister baksa Chief Adviser Thomas A Sangma, Health and Family Welfare minster, James PK Sangma, NPP-ni National Secretary Dr. Rajiv Jaiswal, West Garo Hills Deputy Commissioner, Ram Singh, aro Nokmarang unbaksana chugipa gadango kam ka·gipa officer-rang bak ra·angtokaha.
Uandake tom·anio bak ra·e aganprakatengon, Chief Minister, skill hub-ni gimin talataniko on·atengon, “ia kror 151.9 damni project, India-ni skanggipa project ong·a, Dumindikgre a·kingo songdongkamgipa ma·chong aro nokmarang skill hub-ko rikna a·ako on·aha. Ia project-o ge 300 palangni multi-speciality hospital, pharmaceutical college, skill development centre, ge 100 palangni nursing hospital, ge 100 palangni para-medical hostel, ge 500 palang donggipa boys’ hostel, ge 200 palang donggipa girl’s hostel aro working women’s hostel- iarangko man·gopa. Project-ko Ministry of Minority Affairs, Social Welfare Department-ni gita sanction ka·aha aro jekon rika matchota ja·man Health Department-na pakwatgen. Uandake iandakgipa project-ko Garo Hills a·jana ra·baanina North Tura joloni MLA Thomas A Sangma-ko de·mittelataha. Iarangni gisepo Meghalaya sorkari aro songni manderangni gisepo soi ka·grikgipa agreement-ko chu·sokatna chief minister ka·dongataha.
Indake ong·engon Health and Family Welfare-ni Minister James PK Sangma-ba tom·anio bakko ra·e aganprakataon, “Union Minister for Minority Affairs Mukhtar Abbas Naqvi-ko project-ko sanction ka·anina mittelataha. Aro ia hub-ara Garo Hills a·jao songdonggiparangna namen dakchakbegipa ong·gen ine aganaha.”
Jolni MLA aro chief minister-ni Adviser Thomas A Sangma, indine aganskaha, “Dumindikgre A·kingni Nokma aro songdonggipa ma·chongrang medical skill hunar hub-ko rikna gita 98 bigha a·ako on·aha.”
Uandake Deputy Commissioner Ram Singh, tom·anio rimchaksoani kattarangko aganangaha aro Social Welfare Department-ni Director DD Shira, mittelpilani kattarangko aganangskaha.
