TURA: Chang 14-gipa Zonal Youth Convention-ko bilsigni ja·man, Walbakgre-o re·anggipa May 13 tarikoni 15 tarikona ong·atangaha.
Ia Youth Convention-ko bilsiantian ong·atrongengoba 2020 aro 2021 bilsirangode COVID-19 sajinmani a·sel ong·atna man·jahachim indiba ia chango sajinma namkalangahani gimin ong·attaina man·aha ine kobor on·aha.
Ia convention ba chadamberangni tom·bimonganiko St Mary’s Higher Secondary School-ni Principal Fr Thomas C John, do·ga oe on·angaha aro ia tom·bimonganio sak 250-mangni gita chadamberang bakko ra·angtokaha.
Ia tom·bimonganio ICYM-ni gitcham national president Jyotsna D Souza, Manipur-ni regional president Magdalene aro Shillong-oni YCS/YSM regional president Alva-ba dongpae bak ra·angaha aro an·tangtangni Youth Ministry-o kam ka·anirangko chadamberangna agan-talate on·angaha.
Ia tom·bimonganiko ong·atanio debate, Bible Skit, Rosary Procession aro uandakgipa dingtang dingtang program-rangkoba chadamberangna ong·atangaha.
Ia tom·aniko ong·atanio Junior College-ni Principal Fr Jogesh D Sangma aro Diocese-ni Youth Director Fr Lyndoh T Sangma-ba chadamberangna agan-ku·pattianirangko on·angaha.
Bon·kamgipa salo Fr Salgrak Momin, Holy Mass-ko dakdilangaha aro chadamberangko gisiko nange kam ka·china didiangaha.
Changgipin Youth Convention-ko Araimile Parish-o ong·atangskagen ineba u·iataha.
