SHILLONG: Shillong songjinmani Mawlai Mawiong-o Inter State Bus Terminus (ISBT)-ko rikanirang namjahani gimin ia ISBT-ko taridapna gita bakan a·dokni Chief Minister Conrad K Sangma aro Transport Minister Dasakhiat Lamare baksa agangrikgen ine Mongolbar salo, ra·galako man·gipa Congress MLA Ampareen Lyngdoh parakataha.
Iani bidingo kobor ra·timgiparang baksa agangrikengon, ISBT-ni nokkingrango selpruani aro pakmarango be·srianirang donggenchimode uan namen kragijani ong·aha ine Lyngdoh parakataha.
Police Bazar-o donggipa Meghalaya Transport Corporation (MTC)-ko bakan dontongatna siengahani gimin ISBT-ko chalaianiara namen nangchongmotgipa ong·engaha ineba Lyngdoh parakataha.
“Ia nokko rikanio iandakgipa neng·nikanirang donggenchimode ia nokko jako ra·e chalaianio bang·a neng·nikanirangko chagrongna nanggen,” ine Lyngdoh aganaha.
Da·o dipet ua an·tangde ISBT-ona re·ange niea dongkujani gimin ISBT-ko rikanio nama namja an·tangde name ma·sikujaenga ineba ra·gala man·gipa Congress MLA aganaha.
Indake ong·engon, Shillong-ona re·baenggipa aro Shillong-oni ISBT-ona re·angenggipa manderangni neng·nikanirangko man·na nangengani gimin badi ka·anirangkode ua knasona man·aha ineba Lyngdoh parakataha.
“Manderang ISBT-ona re·ruraanio neng·nikanirangko man·na nangja ine anga Transport Minister baksa agangrikaha. ISBT-oni Shillong-ona manderangko salruraenggipa garirangna pararangko tik ka·a dongjagenchimode gari pararangko tol·eba ra·tokaigen,” ine Lyngdoh aganaha.