SHILLONG: NPP-chi dilenggipa MDA sorkariko, Congress doloniko ra·gala man·gipa MLA Ampareen Lyngdoh, mittelpile aganangaha.
Iani bidingo kobor ra·timgiparang baksa agangrikengon, uamangni Congress dolo ong·e Opposition dol ong·engmiting somoioba MDA sorkari, pangnan opposition dolni agananirangko knachakrongachim ine Lyngdoh parakataha.
“Batanggimin bilsi brina chinga sorkariko matnangengachim indiba bilsisani gisepo chinga sorkarini bak ong·pae chingni gamchatgipa ku·pattianirangko sorkarina on·na nangnikaha,” ine Congress doloniko ra·gala man·gipa MLA aganaha.
Lyngdoh-ni parakatani gitade, ia 2022 bilsioni CUET porikkako a·bachengatanio Meghalaya a·doko chatro chatrirangni chagrongna nangenggipa neng·nikanirangkoba ia sorkari namatna gita man·aha.
Apsan daken, a·dokni adhoc skulrango skigiparangni dabianirangnaba ia sorkari namgipa aganchakaniko on·na man·aha ine Lyngdoh aganaha.
2019 bilsio Supreme Court-ni ge·etaniko man·aonin ia sorkari, a·doko niam gita koela bikotaniko a·bachengatna rakbee kamrangko ka·enga ineba Lyngdoh parakataha.
Ia sal somoirango manderangni nangchongmotgipa bosturang dam rakbatroroengani gimin janapatengon, ia neng·nikanikoba NPP-chi dilenggipa MDA sorkari namatna raken kamko ka·enga ine Lyngdoh parakataha.
