SHILLONG: Ma·mongni Education, Skill Development aro Entrepreneurship Minister Dharmendra Pradhan Sonibaro agana je darangkoba, darang ku·sikkoba ra·na draja Garo, Khasi aro Jaintia gita dakgipa joltangni ku·sikrang ba jeba ku·sikrangba pilakan national language ba a·songni ku·sik ong·a.
Indiani joltangni ku·sik pilakan rongtala aro gamchata aro pilakan a·songni ku·sik ong·a ine National Education Policy-o Prime Minister Narendra Modi janapaha ine aganengon, “ Khasi, Jaintia, Garo, Asasmese, Bengalli, Telegu, Tamil, Punjabi, Marathi aro gipin ku·sikrang ong·chong, pilak a·songni ku·sik ong·a,” minister aganaha.
Ma·mong, Hindi-ko compulsory ba nangchongmotgipa dakatna jajrengani gimin aganengon, iade namen ong·chongmotja aro ong·gija jangatanirangkode gelna nanga, ua aganaha.
“Darangba, darangni ku·sikkoba darangkoba ra··china draja, angaba jinmani palo kam ka·gipa ong·a aro anga Prime Minister-ni policy-o janapgimin gita re·na nanggen aro ian India sorkarini ra·gatgimin policy ong·a,” Ma·mong minister aganaha.
Unaskang, salgro salaramni damchet a·dokrango sak hajal 22 Hindi skigiparangko kamo rakkiaha jemangan salgro salaram a·doko Class X-ona kingking Hindi ku·sikko ra·na nangtelgipa dakatna namniktokaha ine Ma·mongni Home Minister Amit Shah-ni agangipa kattarangna salgro salaramo ding·chaoengahachim.
Parliamentary Official Language Committee-ni Chairman ong·ani gimin Shah ia kattarangko ku·pattia gnangsa aganahachim ine A·dok BJP, chel·chakna jotton ka·engachim, jeni bidingon a·doko jegalanirangko batoroaha.
Amit Shah-ni kattani bidingo political dilgiparangni student body-ona kingking bang·an jegaltokaha, unomitingo Salgro Salaramni neng·nikanirangko niatjani gimin Opposition AITC dilgipa Mukul Sangma, Ma·mongni kosako matnange aganaha aro indake dakgenchimode a·jolo meli-nangrime donganiko bingbrangatgen ineba aganaha.