TURA: Adita salrangna skang, North Garo Hills a·jani Resubelpara-o sak 400-na baten me·chikrang Trinamool Congess-o napangtokaha aro ia tom·anio Resubelpara Block Mahila Trinamool Committee-ko songe donangjolaha.
Ia tom·anio All India Trinamool Congress (AITC)-ni MDC Rinaldo Sangma-ba dongpae bak ra·angaha aro ia tom·anio ua jinmana aganprakengon, AITC dolara dingtangmancha me·chikrangna kamko ka·gipa dol ong·e, me·chikrangko mangrakbatatna kamko ka·enga ine parakangaha.
Meghalaya a·dokni me·chik sakantinan kamko ka·na gita ia dol on·kange kamko ka·enga ineba Sangma aganaha.
“Da·alo Resubelpara-o Mahila block committee-ko songna gita bang·bea manderang aro mongsongbate me·chikrangni re·mikkangbaaniko nike anga namen kusi ong·a. A·doko dingtanganiko nangniktokengani giminsa da·alo bang·bea manderang aro mongsongbate me·chikrang Trinamool Congress-ona re·baaha,” ine Rongrong MDC aganaha.
Koborko on·ani gitade, ia Mahila Block Committee-ko Saithina Shira, president ong·e dilanggen.