TURA: Re·anggipa jao Deputy Commissioner (DC) office-o kam ka·enggipa manderangko cha·bokgipa sakchet manderangko rim·na man·ahani gimin, West Garo Hills a·jani Police dol, adita sak police-rangna mittelpilani certificate-rangko on·aha.
Re·anggipa jao, rim·ako man·gipa manderang, an·tangtangko West Garo Hills-ni Deputy Commissioner (DC) ine tol·enba, DC office-o kam ka·enggipa manderangoniko gong 5,50,000 tangkarangko cha·boke ra·ahani gimin Tura Police Station-o mokordoma ka·ahachim aro uandaken police-rang, ta·raken kamrangko ka·enba, ia manderangko rim·na man·ahachim.
West Garo Hills a·jani Superintendent of Police (SP) VS Rathore-ni u·iatani gitade, ia manderangni kosako mokordoma ka·ani ja·man, Special Investigation Team-ko songenba, uni ning·o kamrangko a·bachengate ia manderangko rim·na man·aha.
“Sakkirangko man·ani ja·man, ia cha·boke ra·gipa manderangoni sakbriko Rajasthan, sakgniko Uttar Pradesh aro sakgniko Assam-oniko rim·na man·aha,” ine SP Rathore parakataha.
Iandake internet gita manderangoniko cha·boke ra·enggipa manderangko police-rang sandiengkua aro gipin manderangkoba da·o a·songni dingtang dingtang biaprangoniko rim·kunaba gnang ine SP parakataha.
