SHILLONG: Shillong songjinmani Mawlai Mawiong-o Inter State Bus Terminus (ISBT)-ko rikanirang namjahani gimin inquiry-ko dakchina dingtang dingtang dolrang dabitokengon, iani bidingo judicial inquiry-ko dakna nangani katta dongja ine a·dokni Transport Minister Dasakhiatbha Lamare parakataha.
Shillong songjinmani ISBT-o, re·anggipa anti mikkarang jimbee waangani ja·man, nok ning·ao be·srianirangko aro chi joksruanirangko nikna man·angahachim.
Indake ong·genchimoba, ia ISBT-o nosto ong·aniara inditana ong·ja aro iandake chonchongipa kamrangna judicial inquiry-ko dakna nangani katta dongja ine Lamare parakatskaaha.
Transport Minister-ni parakatani gitade, nokrangko ba iandakgipa building-rangko rikanio pangnan chonchongipa dakgualani ba nosto ong·anirangkode nikna man·rongaiachim.
Iani bidingo judicial inquiry-ko dakatna jechakatengon, nok ning·ao be·srianirangko aro nokking gita chi leak ong·ani a·selrangko name ma·sina man·na gita departmental inquiry-ko dakatskagen ine Lamare parakataha.
Indake ong·engon, PWD (Roads)-ni official saksa, Mawlai Bypass-ni dolong nosto ong·engaha ine matnanganiko jegalatskaenba, ia dolongni chuaniara metre 30-40-mang ong·ani gimin a·akosa gapatna nangengachim ine talataniko on·angaha.
Ia dolong chuani gimin ia dolongona road roller-ko ra·ange a·a gapatna gita ia kamko ka·gipa contractor neng·nikaniko man·ahachim ineba PWD official parakataha.
Ia dolongko taridapanirang matchotaha aro Sukrobar salonin ia dolong gita garirangko re·na on·engaha ineba ua parakataha.