TURA: NPP-chi dilenggipa MDA sorkari, dingtang dingtang kamrangko ka·anio tangka paisarangko jakkalsretenga ine Bristibar salo Tura-ni BJP MDC Benard N Marak matnangatenba, iani bidingo aro adita salrangna skang, gital Assembly building-ni protchong be·grugipani bidingo CBI-chi inquiry-ko dakna nangengani gimin jera ra·grikna gita a·dokni Chief Minister Conrad K Sangma-ko ra·biataha.
“MDA sorkarini tangka jakkalsretanirangko aro kam ka·sretanirangko CBI-chi inquiry-ko dakna nangengani gimin hai ang baksa jera ra·grikna re·babo. Sorkarini kam ka·sretanirangoniko man·e cha·pana gitade BJP, MDA-o bakrima ong·ja indiba sorkarini kamrangni gimin ku·rangko on·na gitasa ong·a. Ia ra·bianiko ra·chake an·tangni ma·sianiko jinmana mesokebo. Chinga BJP dolde, tangka paisa jakkalsretani bidingo ku·rang on·aniko dontongjawa. CBI inquiry-ko maina jechaka CM Conrad Sangma, jinmana mesokchina,” ine Marak parakataha.
BJP dolde tangka cha·gipa dol ong·ja ine janapatengon, BJP-ni ning·o ra·gatgipa dingtang dingtang scheme-rangara, manderangni namgnina aro mongsongbate kangal cholgrirangna miksonge ra·gatgipa scheme-rangsa ong·a ine Tura-ni BJP MDC parakataha.
MDA-o bakrimenggipa pilak dolrangan an·tangtangni tol·anichi kangal cholgrirangoniko ra·seke ra·enga ineba Marak parakataha.
Jolni dingtang dingtang dolrangko aro MDA-o bakrimenggipa gipin dolrangko, namgipa sorkariko chalaina jak on·pachina gitaba BJP-ni state vice president didiataha.