Tura: Meghalaya sorkarini Deputy Chief Minister Prestone Tynsong Sonibar salo Tura Dakopgre-o New Housing Office Building aro MIG building-ko oprakate on·angaha.
Tom·anio bakko ra·e aganprakataon Prestone Tynsong, “sorkari a·dokni manderangni nikjumanganiko chu·sokatna raken jotton ka·enga, da·o bilo donge kam ka·enggipa sorkari Chief Minister Conrad Sangma aro gipin Minister-rangni dilanio, gimik district headquater-rango aro Sub-Divisional level-o Mini Secretariat-ko rikna tik ka·aha, ian a·dokni manderangna bilongen namgni ong·gen. Skanggipa Mini Secretariat-ko Tura-o a·bachenggatgen uni ja·man Jowai-ona re·angskagen, indake gipin district-rangonaba ka·sinsin sokanggen, ine parakataha.
West Garo Hills Tura-ni Deputy Commissioner-ni district official aro staff-rangna dongchakani komia ba chu·onggijanio u·iataniko man·enba sorkari, mikkangchi Middle Income Group (MIG) aro Low Income Group (LIG) Housing complex-rangko a·doko rikna tik ka·aha ine Deputy Chief Minister agantalataha. Iarangna agreba a·doko dal·dalgipa infrastructure development, road project aro gipin development project-rango kam ka·enga, ine janapate, Deputy Commissioner-ni Garo ku·sikchi speech-ko on·anina de·mittelataha aro an·tangba mikkanchi skie ra·na kusi ong·en ine aganaha.
Chief Minister-ni Adviser aro North Tura-ni MLA Thomas A Sangma-ba tom·anio bakko ra·e aganprakataon, ‘Chief Minister Conrad K Sangma aro Deputy Chief Minister Prestone Tynsong-uamangni gital Office Building-ko rikna ja·ku de·anina de·mittelataha.
Kam ka·ram biaprango chu·onga gita biap dongna nangchongmota ine Deputy Commissioner Swapnil Tembe aganaha aro Deputy Chief Minister-na Tura Deputy Commissioner Office-o gital gital branch-rang ong·katrikrikengani gimin biaprang namen komienganiko u·iataha. Aro district-o bang·bate MIG aro LIG-ko rikchina mol·molaha.
Indake ong·engon Housing, Meghalaya Shillong-ni Director David A Sangma-ba tom·anio bakko ra·e, ‘Meghalaya sorkari, a·dokni namgnina kam ka·enga’ ine aganaha.
