SHILLONG: West Khasi Hills-ni Regional Committee-ni Chairman Renikton Lyngdoh indake agana je uni Committee namen kam ka·aha maina Meghalaya, dam 25 songrangoniko dam 23 songrangko man·rikaha, damgni songrangkosan manderangni Assam-o dongna skani gimin Assamchina sokatangaha.
West Khasi Hills-o sima arirangko tik ka·grikaniko dakani bidingo jegalanirang batroroengani gimin sing·anina aganchakengon, Meghalayani bak ong·gipa songrang bang·en donga, indiba manderangan Assamchi dongna namnikgiparang ong·skaa ine Renikton Lyngdoh Tongkhar aganaha jean West Khasi Hills-ni Regional Committee-ko skotong ong·e re·dilengachim.
“Chinga chingni changa gitan kam ka·a aro dam 25-oniko dam 23 songrangko Meghalaya-chi man·rikaha aro Malchapara aro Salbari ia damgni songrangkosan gimaataha, jeni manderangan Assam-o dongna siktokaaha,” Tongkhar aganaha.
Minister indakeba agankua je Meghalaya Sorkari da·oba uamangna dakgrikenga aro iano songdonggipa manderangara Garorang ong·ani gimin iamangde Meghalaya-chin ong·na nanga ine Meghalaya Sorkari ku·pattianirangko dakenga.
“Indiba Assam aro Meghalaya dolgni regional party-rangni re·ange sing·sandianiko dakanio, iano songdonggipa manderang, uamangni Assamo dongna skaniko Committee-na aganaha, unigimin uamangni namnikaniko chu·sokataha aro ua songgniko Assamna donangaha,” ua aganaha.
Unomitingo, ia songgnini manderang da·omitingo Meghalayaon dongna skaniko aganaha aro uamangko Meghalayao chanchapatchina dabiaha aro jingjengataniko dakenga, unigisepon MoU-ko ra·galjaode aro uamangko Meghalayao chapatjaode jingjengataniko dakangkugen ine aganaha, jeon uamang an·tangtangan Assam-o dongna skaniko parakaha ine Meghalaya sorkari aganskaenga.
