TURA: Re·anggipa Sonibar salo, All Garo Hills IV Grade Govt Employee Association (AGHIVGGEA)-ni annual general meeting ba bilsini tom·bimonganiko Baghmara District Unit-o ong·atangaha aro ia tom·aniko association-ni president Noresa Marak dilangaha.
Ia tom·bimonganio Garo Hills gimikni 4th Grade worker-rang bakko ra·e apsan chanchirimangengon, sorkari office-rango 4th grade-ni kamrangko ka·enggiparangni man·na nanganirangko chu·onga gita on·china sorkario dabiangtokaha.
4th Grade employee-rangni man·na nangenggipa Medical Allowance aro Hill Allowance-rangni gimin chanchiangengon, kam ka·enggipa manderangni nokdangrango sagipa ding·gipa manderangko sanna banna on·enggipa tangka paisarangara chu·ongjaenga ine AGHIVGGEA chanchirimangenba, 4th grade employee-rangna medical allowance aro hill allowance-rangko chu·onga gita on·china sorkario dabiangaha.
4th Grade worker-rang chu·onga gita poraia gadang dongode aro bilsirang chu·onga gita ong·ode uamangko upgrade ka·na nanga aro IV Grade Wages-o kam ka·gipako bilsi 10 ong·ahaode payscale on·e kamo rakkina nanga ineba ia tom·anio AGHIVGGEA, sorkario dabina tik ka·e donangaha.
