TURA: North Garo Hills a·jani Mendipathar College-o skigiparang aro kam ka·giparang chu·ongjaengani a·sel, college-o poraienggipa chatro chatrirang neng·nikanirangko chagrongna nangtokenga ine Mendipathar College Students Union (MCSU), a·dokni Chief Minister Conrad Sangma-na sedoatenba, ia college-o skigiparangko aro gipin kam ka·giparangko rakkidapchina gita didiataha.
MCSU-ni parakatani gitade, Mendipathar College-ko 1971 bilsini July 30 tarikon Gauhati University-ni ning·o chapate a·bachengahachim indiba Meghalaya a·dokko man·chengaonin ia college-ko North Eastern Hill University (NEHU)-ni ning·o ra·skaahachim.
Ia college-ko jolo donggipa kangal cholgrirangna miksonge kuliahaoba mamingni gita tang·dopana man·jaengani a·sel ia college-o poraienggipa chatro chatrirang neng·nikanirangko chagrongna nangtokenga ine MCSU parakataha.
“UGC-ni dongimin niam gitade, honours course-ko on·enggipa college ge·antion komibeoba ge 5 ba ge 6 sanction ka·gimin post-rang dongna nangachim indiba ia college-ode UGC-ni niamrangko chu·sokatkujaenga. Ia college-o English, Garo, Economics, History, Political Science, Philosophy aro Education subject-rango honours course-rangko on·engachim indiba sanction post-rangde chu·ongkujaenga,” ine MCSU parakatenba, English-na ge 3, Garo-na ge 5, Political Science-na ge 3, Economics-na ge 3, History-na ge 3, Philosophy-na ge 4, Education-na ge 5, Assamese-na ge 1, Environmentasl Studies-na ge 1 aro Computer Science & Application-na ge 2 sanctioned post-rangko ong·katatchina Chief Minister-ko didiataha.
