SHILLONG: 2023 bilsini Assembly election-na da·o adita jarangsan dongaiahani giminsa Bharatiya Janata Party (BJP) aro United Democratic Party (UDP)-ni dilgiparang, National People’s Party (NPP)-ko manderangni nikanio namgijagipa dol dake ong·atna jotton ka·enga ine Sombar salo, a·doknib Deputy Chief Minister aro NPP-ni national vice president Prestone Tynsong parakataha.
“Da·o election sepangengahani giminsa uamang chingko matnangna jotton ka·enga. Angni UDP-ni dilgiparango sing·anide, NPP-chi dilenggipa MDA sorkari, a·dokna namgija kamrangko ka·aha ong·ode maini gimin President’s Rule-na kenna nanga. President’s Rule-na Indian Constitution-ni gitasan ong·aia,” ine UDP-ni chief advisor Bindo Mathew Lanong-ni agangipa kattarangna Tynsong, aganchakaniko on·angaha.
MDA-o bakrimenggipa dolrangni matnanganirangna NPP maming aganchakani dongjawa ineba Tynsong parakataha.
“Indiba mingsakosan anga talate on·na nangnikaia aro uan, MDA-o aro MDA-ni coordination committee baksa chanchirimchengesa chinga sorkarini gita pilak kamrangkon ka·enga,” ine Tynsong aganaha.
Sorkarini pilak kamrangko ka·engon, MDA-o bakrimenggipa pilak dolrang baksa agangrikchengesa kamko ka·enga ineba Deputy CM parakataha.
MDA sorkarini kamrangna da·o NPP-kosa matnangna jotton ka·skaengaha ineba ua aganaha.
“Chinga, Chief Minister Conrad K Sangma baksa matnanganirangko ra·chakna kusi ong·aia. Chinga darangkoba dos galna sikja,” ine Tynsong aganaha.
NPP dolni dilgiparang da·o a·dokni manderangonan ka·donge re·angpilgen aro manderang NPP-o ka·dongna man·ama man·ja uko nigen ineba NPP-ni national vice president parakataha.