WGH-ni KVK World Milk Day-ko manianga

TURA: A·gilsakni gipin biaprango gitan, World Milk Day-ko Budbar salo, West Garo Hills a·jaoba ICAR-KVK-ni gita manidilangaha.
Dairy industry-ni ong·baaniko gisik ra·e manina aro dudko a·gilsako mongsonggipa cha·ani ringani ine ra·na gita bilsiantian ia World Milk Day-ko June jani 1 tariko manirongengachim.
Ia salko manianio ICAR-KVK-ni official-rang, program-o bak ra·giparangna aganprakangengon, dudni mandena gamchatgipa ong·ani gimin talatanirangko on·angenba, dudrango calcium aro vitamin D donge mandeni be·enko name dongna gita dakchakani ong·a ine parakangaha.
Dudko salanti ringjringanichi mandeni grengrangko mangrakatna aro ka·tongni sabisirangko komiatna dakchaka ine talataniko on·angengon, 250 ml dudko ringanichi bi·sani salantio nanggipa protein-ni 48 percent baksana 9 percent calories-ko on·na dakchaka ine KVK official-rang parakataha.
Garo Hills-o Tribal-rangni cha·a ringani bewal dingtanggrikani a·sel bang·bata manderangan dudko ringna gita namniktokja ine janapatengon, ia Milk Day-ko maniani manderangna dudni gamchatgipa ong·aniko talate on·na dakchakani ong·gen ine KVK-ni official-rang parakataha.
Ia program-ko ong·atanio Chunmati Lower Primary School-ni chatro chatrirang, Rombagre Nawepil Dairy Cooperative Society-ni membor-rang aro jolo songdongenggipa manderangba dongpae bak ra·angtokaha.
Ia tom·anio, cooperative society-ni president Rikrak Sangma-ba, an·tangni dudrangko bading chiwalanio skie ra·gimin kamrangni bidingo jinmana agan-talate on·angaha.