TURA: Shillong songjinmani Mawlai Mawiong-o donggipa Inter State Bus Terminus (ISBT)-oni Shillong songjinmani dingtang dingtang biaprangona taxi pararangko rakdugae ra·engani a·sel manderang aro mongsongbate Garo Hills-oni re·ange poraienggipa chatro chatrirang neng·nikanirangko man·tokna nangengani gimin, ISBT-oni dingtang dingtang biaprangona re·ruraenggipa manderangko salrurana gita dingtang cholrangko on·china Sukrobar salo, Rongrong-ni All India Trinamool Congress (AITC) MDC Rinaldo Ninja K Sangma, Meghalaya a·dokni PWD Minister Minister Dasakhiat Lamare-na sedoataha.
Iani bidingo PWD Minister-na seachi u·iatengon, Shillong ISBT-oni dingtang dingtang biaprangona re·ruraenggipa manderangko salruraenggipa taxi-rang nangana bate parako ra·engani a·sel songregiparang aro mongsonggipa Garo Hills-oni re·anggipa manderang, neng·nikanirangko chagrongna nangtokenga ine MDC parakataha.
Sangma-ni parakatani gitade, Shillong ISBT-ona da·o dipet sorkarini watenggipa garirang dongkujani a·selan taxi-rang nangana bate pararangko ra·na cholrangko man·enga aro iani a·sel ramram manderang aro mongsongbate poraienggipa chatro chatrirangsa neng·nikanirangko man·tokna nangengachim.
Ia neng·nikanirangko namatani kamara sorkarini daitoan ong·a ine janapatengon, ua an·tangan ia kamko jako ra·enba, manderangni namgnina ta·raken ja·kuko de·china Rongrong MDC, a·dokni PWD Minister-ko didiataha.