SHILLONG: Meghalaya a·doko BJP sorkariko rikna man·genchimode, bilsi bongani gisepo lakni lak kamrangko ong·katate on·na man·gen aro gipin biaprango kam ka·e cha·enggipa chadamberangnaba a·doko kamrangko on·gen ine BJP-ni MLA aro Cabinet Minister Sanbor Shullai parakataha.
“Meghalaya a·doko BJP bilona re·bagenchimode, bilsi bongani gisepon lakni lak kam ka·e cha·ani cholrangko ong·katate on·na man·gen aro dol 10 battalion-rangkoba bikote on·na man·aigen. Gipin biaprangona re·ange kam ka·enggipa chadamberangkoba chinga a·dokona okamatpile a·doktangon kamrangko on·gen,” ine Shullai aganaha.
Meghalaya a·doko kam ka·e cha·ani cholrang dongjani gimin a·dokni lekka pora donggipa sak 75,000 chadamberang, dal·dalgipa jillarangona re·ange kamrangko ka·e cha·na nangtokenga ine janapatengon, Meghalaya a·doko da·onan medical aro engineering college-ba dongkujaenga ine BJP MLA, an·tangni suk ong·gijaniko parakataha.
Nagaland a·dokode BJP-ni sak 12 MLA-rangko seoke namgnirangko man·na a·bachengengaha ineba Shullai parakataha.
“Bilsigni skangsan, Nagaland a·dokni Naga regiment-o ge 2000 kamrangko ong·katdapate ia regiment-ko bilakbatatna gita gong kror 5000-ko man·aha aro re·anggipa bilsioba dingtang dingtang department-rango lak 7 kamrangko ong·katatna gita gong kror 8000 tangkarangko man·sotaiaha,” ine Shullai aganaha.
“Nagaland a·dokni manderang, namroro silroroani aro a·dokni dal·roroanikode Narendra Modi-chi dilenggipa sorkarionikosan man·aigen ine ma·sitokaha aro da·o Nagaland a·dok naljokgipa ong·aha,” ineba ua aganaha.
Salgro salaramni gipin a·dokrangba da·o BJP-chi sason ka·gipa a·dokrangni namgnirangko ma·sina a·bachengengaha ine janapatengon, Mizoram a·dokni Mara Autonomous District Council (MADC)-ni manderangba BJP-ni kosako matnanganirangara kakket ong·ja ine ma·siahani giminsa MADC election-o BJP-ni chegopaniko nikna man·aha ine Shullai parakataha.
Election-ni somoimangmango tol·e ku·mikchetgipa political dolrango bebera·jachina gitaba ua a·dokni manderangko didiataha.
 |
ReplyForward
|
