TURA: Tura Public School aro Montfort School-na gong lakprakko on·e da·o bilsiantian World Environment Day-ko maniani somoirango bilsi bongana apsan tangka paisarangko on·e dakchakanggen ine Sombar salo, Rajabala-ni gitcham MLA aro Batabari-ni UDP MDC Ashahel D Shira, World Environment Day-ko maniengmiting somoio ku·rachakaniko on·angaha.
Sombar salo, World Environment Day-ko maniengmiting somoio gong lakprak tangkarangko Shira, Tura Public School aro Montfort School damgninan on·angjolaha aro da·o bilsibongana ia apsan World Environment Day-ko maniani somoirangoba apsan tangko on·na gita ku·rachakangaha.
Sombar pringo ua Tura Public School-ona re·angaha aro ia skulo Eco Club kuliako nike chatro chatrirangni kamna an·tangni kusi ong·anikoba parakangaha. Tura Public School-ni chatro chatrirang herbal garden-ko a·bachengatenga ine nikenba Shira, ia skulna bilsiantian gong lakprakko da·o bilsi bongana dakchake on·na ku·rachakangaha.
Iani ja·mano ua joljol Tura Montfort Centre-onaba re·ange World Environment Day-ko manianio bakko ra·eaha aro skulo chatro chatrirang aro skigiparang baksa bolrangko ge·anio bakko ra·angpaaha.
Ia skulnaba ua da·o bilsibongana gong lakprak ka·e dakchakangkuna ku·rachakaniko on·angaha.
