Skanggipa State Women’s Conference-ko ong·ata

SHILLONG: Meghalaya a·doko skanggipa changna State Women’s Conference ba me·chikrangni tom·bimonganiko Budbar salo, Shillong songjinmani State Convention Centre-o ong·atangaha aro ia tom·bimonganiko ong·atanio a·dokni Chief Minister Conrad K Sangma, a·dokni Social Welfare Minister Kyrmen Shylla, Chief Secretary RV Suchiang, Principal Secretary P Sampath Kumar, Meghalaya State Commission for Women (MSCW)-ni Chairperson Phidalia Toi aro a·dokni dingtang dingtang biaprangoni me·chikrangba dongpae bak ra·angtokaha.
Ia tom·bimonganiko a·bachengatanio dingtangmancha Union Women & Child Development Minister Smriti Zubin Irani-ni internet gita Delhi-oni aganprakatanikoba jinmana mesokangaha. Union Minister, Delhi-oni a·dokni me·chikrangna aganprakatengon, me·chik aro bi·sarangni namgnina iandakgipa me·chikrangni tom·bimonganiko ong·atenganina Meghalaya sorkariko mittelpilataha aro iandakgipa kamko India sorkari aro gipin a·dokrangba daksningpana cholrangko man·gen ine parakataha.
Ia me·chikrangni tom·bimonganiko ong·atanio a·dokni Chief Minister Conrad K Sangma-ba jinmana aganprakangengon, ian da·o dipet dal·batsranggipa me·chikrangni tom·bimongani ong·enga ine janapatenba, ia tom·bimonganio dingtang dingtang biaprangoni me·chikrang bakko ra·enga aro ia apsan program-kon dam 46 block-rango donggipa sak lakgnimangni gita me·chikrang, dingtang dingtang cholrangchi nisotokenga ine parakataha.
Meghalaya State Commission for Women (MSCW)-ni kamrangna mittelpilaniko parakangengon, ia commission-ara me·chikrangnasan ong·aigija songsalni namgninaba kamko ka·enggipa ong·a aro MSCW baksa chanchirimani ja·mansa ia tom·bimonganiko ong·atna manchiaha ine Chief Minister parakataha.
Ia State Women’s Conference-ko sorkari aro MSCW, mikkangchi bilsiantian ong·atangna tik ka·aha ineba ia tom·anio Chief Minister parakataha.
Ia tom·bimonganio a·dokni Chief Minister, Early Childhood Development Mission aro gital dake taritaigimin 181 Helpline-koba a·bachengate on·angjolaha.