TURA: Re·anggipa Sonibar salo, Ja·ripbonchina Livelihood Society-ni gita, North Garo Hills a·jani Dainadubi Circle Youth Organisation (DCYO) aro A·chik Indigenous Justice Initiative Forum (AIJIF) baksa nangrimenba, dingtang dingtang scheme-rangni bidingo Chisim Apal jolni chadamberangna agan-talate on·na gita awareness program-ko Chisim Apal Community Hall-o ong·atangaha.
Ia program-ko ong·atanio Ja·ripbonchi Livelihood Society-ni director Digros D Shira, chadamberangna agan-talate on·angengon, jolni chadamberangna janggi tangani cholrangko on·na man·na gita sorkarini ra·gate on·enggipa dingtang dingtang scheme-rangni gimin talate on·na ia program-ko ong·ataha ine parakangaha.
Ia program-ko ong·atanichi ja·mano jolni chadamberangna uamang dingtang dingtang NGO-rang baksa nangrime dakchakanirangko on·anggen ineba Shira aganaha.
Ia program-ko ong·atanio Loan, Health Insurance, Agriculture, Food Processing, Tourism, Skill Development aro uandakgipa dingtang dingtang kam aro scheme-rangni bidingo jolni chadamberangna agan-talate on·angaha.
