Tura-o gital dake taridapgipa Auditorium-ko a·dokni CM oprake on·anga

TURA: Tura-o gital dake taridapgimin Auditorium-ko Sombar salo, a·dokni Chief Minister Conrad K Sangma, oprake on·angaha aro ia auditorium-ko oprake on·angani somoio Tura Parliamentary Constituency-ni MP Agatha K Sangma, Chief Minister-ni Adviser aro North Tura-ni MLA Thomas A Sangma, GHADC-ni Chief Executive Membor Albinush R Marak aro dingtang dingtang officer-rangba dongpae bak ra·angaha.
Ia gital dake taridapgimin auditorium-ko oprake on·angani somoio a·dokni Chief Minister, jinmana aganprakangengon, kamko somoi gita matchotate on·ahani gimin officer-rangko aro contractor-rangko mittelpilangaha.
Ia district auditorium-ko uni pagipa PA Sangma sagi, Union Labour Minister ong·engmiting somoio rike on·ahachim aro iako bilsi 30 batpilen taripile on·anirang dongkujaengachim ine gisik ra·atpilaniko on·angengon, 2018 bilsio MDA sorkariko rikchengahaon, ia auditorium-ko taridapna gita a·bachengo gong kror 3-ko chame ja·mano gong kror 2-ko chamdape on·aha ine Chief Minister parakataha.
Ia auditorium-ara gisik ra·na kragipa salrang bang·en donga ine janapatengon, uni pantemiting somoirango ua aro uni dolba ia apsan auditorium-on gitrangko ring·ahachim ine Conrad parakataha.
New Development Bank (NDB)-ni ning·o Tura Smart Town Project gita dakgipa gipin Externally Aided Project-rangkoba ra·gataha ine janapatengon, iani ning·o ming 277 road project-rangko sorkari ra·gataha jenan gong kror 55 tangkarangko a·dokni gita chame on·aha ine Chief Minister parakataha.
West Garo Hills a·jao bakan gong kror 50-ni State of Art Convention Centre-ko rikgnok ine janapatengon, chadamberangna jakni kamrangko skie on·na gita Youth Centre Building-koba rikgnok ine Chief Minister parakataha.
PA Sangma Stadium-o nambatsranggipa robol kal·chakani stadium-ko rikenga ine janapatengon, West Garo Hills a·jao robol kal·na gisik nanggipa chadamberangna football academy-koba kuligen ine Sangma ja·mano ua biapona unbaksa re·bagipa North East United Football Academy-ni co-owner ba nokgipa saksakoba jinmana mesokangaha.
Tura-o Pre-Season Training Camp-ko ong·ate jolni chadamberangna skie on·china gita ua North East United Football Academy-ko mol·molataha ineba Chief Minister parakataha.
North East United Football Academy-ni training-na seokako man·gipa Chusrang Sangma-koba ia tom·anio Chief Minister, jinmana parakataha.
Ia tom·anio Tura-ni MP Agatha K Sangma-ba jinmana aganprakangengon, ia auditorium-ko nitobee taridapahanina an·tangni kusi ong·aniko parakangenba, mikkangchi ia auditorium-o namnamgipa program-rangko sokachakna man·gnok ine parakangaha.